D Pirate
In Solothurn isch der Wahlkampf los es git e wahri Schlacht
Dr Charlie wott der Chefsessel wüu Steffi hets nit bracht
Nur bi üs in Zuchu dört isch scho jetze aues klar
Der Marti Pädu isch haut ou e Wahnsinns grosse Star
Im Höfli cha me nümme nume Bier und Sandwich bstöue
Dört cha jetz mänge grad ou no sis Elektro-Auto abstöue
Dr Chef seit: Mir si haut modern und mache öppis für d’Natur
Und zudem het dr Stammtisch ou mou öppis für nes Gschnurr.
S’Joli het scho letschts Johr gseit: Es isch fertig mit dr Fasnacht
Und mir hei üs soo Müeh gä gha und si sogar i Andacht
Das Hin und Her isch üs egau und spüut ou gar kei Roue
Mir si üs drum das scho gwönt vo üsne liebe Froue.
Us üsem chline Dörfli isch jetzt fast e Stadt entstande
Der Präsi füehlt sich königlich und füehlt sich jetzt verstande
Doch für ne Stadt fäut immer no es wichtigs Element
Zuchu het haut immer no kei Bahnhof us Zement.
Schnuderbuebe
Zuchu het nöi e Metall-Recyclinghof.
Der Platz isch begränzt, dä isch drum nid gross.
Ah die wo no dringend Schrott entsorge müsse:
Chöits eifach bim Mäc, ih Kreisu ine schüesse.
Mir dürfe nid z’lut si. Läset üs vo de Lippe.
Wüu’s Beschwärde het gä, müesse mir öich drum bitte:
Gli nur no lislig z‘klatsche und ou nid lut z‘ lache!
Mir möchte üs nid mit ere Gugge verkrache.
Zuchu chönnt sich überlegge, sich wöue z‘bewärbe
für d’Olympiade Usträgigs-Ort z’wärde.
Bir Wasserqualität, z‘Paris ih der Seine
wäre Wettkäpf ir Ämme auso ou kes Problem.
Du fluechsch im Birchi vorem lääre Regau
und das nid zum erschte, sondern zum 6te x.
Suechsch du und fingsch du, ke Houz ih däm Lade.
Hei si bim Ali wider d‘Schibe ih-g’schlage.
D’Senne vo Zuchu
E Starcoiffeur git’s z’Solodurn, dört gö gärn Promis hi.
Ou d’von der Leien wett zu däm, doch sisch haut Sunntig gsi.
S’Amt für Arbeit vom Kanton, luegt do nid lang zue.
Si leite es Verfahre i, die hei jo süsch nüt z’tue.
E Gondle ufe Wissestei chasch sit 10 Johr benutze,
ei Ma fählt sit churzer Zyt das loht üs doch lo stutze,
d’Bähndli Gäscht düe spektuliere was isch de nur passiert.
Äs isch aues halb so schlimm dr Obi isch pensioniert.
Äs isch haut so – wenn dört gwünnsch, de mueschs organisiere.
Drei hübschi Dame si usgwält, wo das düe moderiere.
Doch wenn das nach üs gange wär, äs isch haut eifach so,
mir Zuchler wäre haut drfür dass sie dr Joel hätte gno.
S’Jolly seit äs isch jetzt Schluss. Ig mache das Johr zue.
Fertig ou mit Dorffasnacht, denn i wott jetzt mi Rueh.
Doch jetzt hei mir glich vernoh, si macht doch no chli witer,
wöu si füehl sich Johr für Johr, immer gäng wie fitter.
